Ngā Karetao Tamariki
He aha te kaupapa nei?

Mātakitakihia te whakaako mō tēnei

Mātakitakihia tēnei kaupapa e whakaakona ai kei 1:09:56 i tēnei kiriata.

Ki te whakawhanake i te papatono rorohiko, me hanga e koe tētahi mahere "tuhiwaehere" i ngā tohutohu mō te rorohiko, whakamātautau, patuiro, me te whakatikatika i ngā hapa, kia tika ai te otinga. Kei ēnei ngohe, ka tūhura ngā akonga i te reo tuhiwaehere māmā. Ka whakaari rātou i ngā tūranga kia mārama ai rātou ki ērā wāhanga o te waihanga papatono.

Ehara tēnei i te mea hanga noa, engari kē mō te nuinga o ngā papatono nui, ka waihangatia e tētahi tīma tangata, ā, mō te nuinga, ka whai tūranga motuhake mō te hanga mahere, mō te tuhiwaehere, me te whakamātautau hoki. Ka hangaia ngā papatono ki te whakaoti hōpanga, ki te āwhina i te tangata kia pai ai te noho i te ao nei. Ko ngā tūranga mahi mō ngā tāngata e hanga ana i te papatono ki te reo tuhiwaehere, ko te kaituhiwaehere (te kaiwhakawhanake, te kaihanga pūmanawa rorohiko rānei) - mā rātou e tuhituhi i ngā tohutohu mō te rorohiko. Kia mōhio ai kua tika te haere o te waehere mō ngā hiahia o te hunga mā rātou te papatono, mā tētahi tangata e whakamātautau te papatono me te whakahoki kōrero ki te kaituhiwaehere i ngā mea e tika ana kia whakatikangia. He kaiwhakamātautau rātou. Mō ngā kaupapa pakupaku, tērā pea mā te tangata nāna te papatono i tuhiwaehere e whakamātautau, engari mō ngā tautono nui, ka tukua te mahi whakamātautau ki tangata kē, kia tuari i te mahi, kia taea ai he tirohanga rerekē, kia hāngai hoki te aronga o te whakamātautau ki te tirohanga o te kaiwhakamahi o te papatono.

I ngā ngohe Karetao Tamariki, ka whakawehea te mahi tuhiwaehere me te mahi whakamātautau, kia kore ai te kaituhiwaehere e whakatika i tāna papatono i te wā o te whakamātautau, ka āwhina hoki tēnei kia mōhio ai ngā ākonga - he kaupapa mahi tahi te waihanga papatono. Me āta whakaaro rātou mō ngā otinga, ā, me mahi tahi ki te whakaoti hōpanga.

Ngā Hangarau Matihiko | Te Tuhiwaehere

Ko te hanga papatono, arā, ko te "tuhiwaehere", ko te mahi a te tangata (te kaituhiwaehere) ki te tāuru i ngā tohutohu i tētahi reo tuhiwaehere kia mōhio ai te rorohiko me aha (he maha hoki ngā mahi kē atu a te kaituhiwaehere). Ko ētahi o ngā reo tuhiwaehere e whakamahia whānuitia i ngā akomanga o ngā kura teina ko Scratch, ScratchJr, Python, Snap!, Blockly me ētahi reo tawhito pērā ki a Basic me Logo (ka mahia tonutia i ēnei rā).

Ehara i te mea ko te tino mahi a te kaituhiwaehere te mōhio ki ngā tono o tētahi reo tuhiwaehere, engari ko te mōhio kē ki te whakahuihui i ngā paraka hanga pērā ki te koromeke, te kōwhiringa, te taurangi, te tāuru me te tāputa, kia tika ai te mahi o te rorohiko. Kei ēnei mahi, ka whakatau i te tūkanga whānui mō te whāinga, ka whakaahuahanga i taua tūkanga i tētahi reo tuhiwaehere, ā, ka āta mahi ki te whakatinana i te whāinga.

Ngā pānga ki te ao tūturu

Ko te whakaraupapa o ngā tohutohu tētahi o ngā āhuatanga nui i ngā reo tuhiwaehere katoa, heoi anō, ko te ngohe Karetao Tamariki tētahi tīmatanga pai mō te ako i ngā reo tuhiwaehere ōkawa. Ka whakaharatau hoki i te matapae, ka aha te papatono, i te whakaaro mō ngā pūtake o ngā hapa. Ka mōhio hoki he maha ngā huarahi tuhiwaehere ki puta ai te otinga tika.

Ko ngā pūkenga e whakawhanake nei: ko te mōhio ki te whakaraupapa kia tika ngā tohutohu; ko te mahi tahi; ko te mōhio ki te wāwāhi i te hōpanga kia taea ai te whakaoti i ngā hōpanga iti rawa i te tuatahi; he pūkenga pai mō ngā kaupapa katoa e mahi ana ngā ākonga, ehara mō te tuhiwaehere noa iho.

He pātai whakaata

• He aha te akoranga ohorere rawa i puta mai i ngā akoranga o tēnei kōwae ako?

• Ko wai mā ngā ākonga kaha ki te whai i ngā tukanga kia tika i a rātou e mahi ana i ngā ngohe?

• Ko wai mā ngā ākonga kaha ki te aro ki ngā taipitopito o ngā mahi o ā rātou ngohe?

• He aha ngā mea ka panoni pea ahau mō taku whakaako i tēnei kōwae ako?

Kia kitea ngā hononga ki te Whakaaro Rorohiko

Kei roto i te maha o ngā akoranga, he hononga ki te whakaaro rorohiko. Kei raro nei ētahi o aua hononga whānui e pā ana ki tēnei akoranga.

Teaching computational thinking through CSUnplugged activities supports students to learn how to describe a problem, identify what are the important details they need to solve this problem, break it down into small logical steps so that they can then create a process which solves the problem, and then evaluate this process. These skills are transferable to any other curriculum area, but are particularly relevant to developing digital systems and solving problems using the capabilities of computers.

He maha ngā hononga i waenga i ēnei ariā Whakaaro Rorohiko, ka tautoko tētahi ki tētahi, engari me mātua mōhio, kāore e puta te katoa o ngā wāhanga o te Whakaaro Rorohiko i roto i ia kōwae, akoranga rānei. Kua tīpako mātou i ngā hononga nui kia kite ai ā koutou ākonga e mahi ana. Ki te kimi mōhiohio anō mō ā tātou kōrero mō te Whakaaro Rorohiko, toro atu kī ā mātou tuhinga mō te whakaaro rorohiko.

Te Whakaaro Hātepe

I tēnei kōwae ka waihanga ngā ākonga i ngā hātepe ki te 'papatono' i te karetao ki te nekeneke i tētahi mātiti. Mā te whakaaro hātepe, ka whakaakona ngā ākonga ki te whakaraupapa i ngā tohutohu hei whakaoti i tētahi mahi. Ka whakamahia he momo tohutohu motuhake mō ā rātou hātepe, ka kimi hoki i ngā ara kē mō te otinga ōrite.

Waitaratanga

He whakawaitara te momo 'tuhiwaehere' e mahi ana ngā ākonga i ēnei ngohe i ngā momo tuhiwaehere ka whakamahi whānuitia mō ngā rorohiko tūturu. I tēnei kōwae, ka whakamahi ngā ākonga i ngā tohutohu māmā, hei reo tuhiwaehere, ka tuhia ngā papatono ki ngā kupu māmā, ā, ka tuku aua tohutohu ā-waha ki te karetao. Nā, ka ako ngā ākonga ki te whakaraupapa i ngā papatono, ā, ka tīmata ki te hanga hātepe, engari kāore e ako i te reo tuhiwaehere i te tuatahi, kāore hoki he kupu uaua, he taputapu matatini rānei.

Ko te kōwhiringa o ngā tohutohu mō te reo tuhiwaehere, he waitaratanga anō (pērā ki te whakamahi i te reta "M", te pere rānei hei whakaahuahanga mō te tohutohu "Mauī").

Kei te ngohe 3, ka whakamahi ngā ākonga i tētahi taumata waitaratanga anō, nā te mea, ka tōaitia ētahi o ngā tohutohu kei roto i te koromeke.

Whakamatariki

Mō ia ngohe i tēnei kōwae ako, ka whakaharatau ngā ākonga i te whakamatariki i a rātou e wāwāhi ana i ngā nekenekehanga e tika ana mō te karetau, ki ngā tohutohu māmā, hāngai hoki ki te mahi. Ka tonoa hoki rātou kia whakapiki i ngā papatono, kia tīmata ki ngā takahanga tuatahi noa iho, whakamātauria, kātahi kia tāpiri tuhiwaehere anō ki te papatono, kia kaua rātou e anga atu ki te whakaoti i te hōpanga katoa i te wā kotahi.

Te whakatau whānui me ngā tauira

I a ngā ākonga e tuhiwaehere ana, e hanga papatono ana rānei mō tēnei kōwae ako, he maha ngā tauira o te raupapapanga o ngā tohutohu ka kitea. Tērā pea ka kitea he huinga tohutohu e tuku ana i te karetao ki tētahi momo nekenekehanga, pērā ki te hīkoi i te tapawhā. Mēnā ka kite ngā ākonga i ēnei momo tauira, ka taea te tukurua i aua huinga tohutohu, tukurua hoki i ngā nekenekehanga o te karetao.

Arotakenga

Ia wā ka tuhiwaehere ngā ākonga i a rātou papatono, ā, ka whakamātautau i ērā, ka arotake hoki rātou, nā te mea ko te pātai nui ko "i haere pai te papatono?". Ia wā ka whakamātautau rātou i ā rātou papatono ka tautohu rātou mēnā kua oti te mahi, kāore rānei.

He maha ngā papatono, ka taea e ngā ākonga, mō ia kaupapa, engari, tērā pea he whāomoomo ētahi, nā te mea, he iti iho ngā takahanga. Mā ngā ākonga e whakatairite i ēnei, me te whakamārama i ō rātou whakaaro i ngā painga ake o ētahi papatono i ētahi atu.

Tērā pea ka taea te whakariterite i ngā reo tuhiwaehere. Ka tuhura tātou i te pānga o te whakaheke i te maha o ngā tohutohu; tērā pea ka taea tonutia ngā whāinga (he ōrite te āhei o te reo tuhiwaehere), engari pea ka roa ake te papatono.

Arorau

Ka whakamahi ai ngā ākonga i ō rātou pūkenga whakaaro arorau i tēnei kōwae. I a rātou e whakamahere ana i ā rātou hātepe, me āta whai e rātou ngā mahi mō ia tohutohu, arā, "i tēnei wāhi, ka aro pērā, nā reira, ki te tohutohu atu ahau kia neke ki mua e rua ngā wā, ka tae rawa ia ki tērā o ngā tapawhā". Me whai hoki e rātou tētahi tūkanga arorau ki te patuiro i ngā papatono mēnā he hapa. Me āta whai e rātou ia tohutohu, ā, ka kite i te wā ka puta te hapa, kātahi ka whakaaro me pēhea te whakatika i te hapa kia tika ai te mahi a te papatono.

Go back to the topic homepage