Mahere kōwae ako: Ngā Whatunga Kōmaka

Mātakitakihia te whakaako mō tēnei

Ka kitea i konei tētahi whakaaturanga o te whakaako i ngā whatunga kōmaka:

Anei ētahi atu ataata e whakaatu ana i ngā wāhi kē e whakamahia ai ngā Whatunga Kōmaka:

• Ataata 1
• Ataata 2

I a tātou e kaha haere ana ki te whakamahi i ngā rorohiko, ā, ka piki haere te raraunga e whakamahia ana e tātou, ka hiahia tātou kia tere ake ngā tukatuka mōhiohio. Ko tētahi o ngā ara kia tere ake ngā rorohiko, ko te tuhi i ngā papatono e whakamahi ana i ngā takahanga iti iho (ka kitea tēnei i roto i ngā akomanga mō ngā hātepe kōmaka me ngā hātepe rapu). Ko tētahi atu ara kia tere ake te whakaoti hopanga, ko te whakamahi i ngā rorohiko maha ki te whakaoti i ngā wāhanga rerekē o te hopanga i te wā kotahi, ko tērā te kaupapa i tūhuratia i tēnei kōwae ako. Ko te raru nui, i te nuinga o ngā wā, ehara i te mea he ngāwari te wāwāhi i ngā mahi ki ngā pūtukatuka rerekē!

Ka whakamahia ngā Whatunga Kōmaka hei kōmaka i ngā uara mai i raro ki runga mā te whakatairite i ngā uara; he rerekē atu te Whatunga Kōmaka i ngā hātepe kōmaka māori, nā te mea ka taea te whakamahi i ngā whakatairiterite maha i te wā kotahi. Hei tauira, i te Whatunga Kōmaka mō ngā nama e ono, ka tauiratia ai i tēnei kōwae ako, ka 12 ngā whakatairiterite ki te kōmaka i ngā nama, engari kei ētahi wā, e toru ngā whakatairite ka whakamahia i te wā kotahi. Nā, ka heke te wā kia oti te kōmaka ki te wā mō te rorohiko kotahi ki te whakaoti i ngā whakatairiterite e 5. He āhua rite tēnei ki tētahi wā ka hiahia koe ki te patopato kia 4 ngā whārangi; mēnā tokowhā ngā tāngata e mahi ana i te wā kotahi ki ngā rorohiko e 4, ka tere ake pea te mahi, ka whakareatia te tere mā te 4.

Mā te tūhura i ngā āhuatanga o te Whatunga Kōmaka e kite ake ai tātou ka hia te tere ake o te kōmaka o ngā uara ina ka taea te tuku i ngā whakatairite i te wā kotahi. Mā te pūnaha matua e ono ngā ara whakarara ka whakamahia i roto i ēnei akoranga ka kōmaka i tētahi rārangi uara kia rearua ake te tere ki tā tētahi pūnaha e āhei noa ki te whakahaere i te whakatairitenga kotahi i te wā kotahi.

Heoi, ehara i te mea ka tere ake ngā mahi katoa mā te mahi whakarara. Hei tairitenga, whakaaro mō te tangata kotahi e keri ana i te kōawa kia 10 mita te roa. Mēnā tekau ngā tāngata e keri ana i te kōawa kotahi mita te roa i te wā kotahi, ka oti tere ake tēnei kōawa. Engari mō te keri rua kia tekau ngā mita te hōhonu, kāore e taea te tīmata i te mita tuarua, kia oti rā anō te keri i te mita tuatahi.

Mō te patopato i te tuhinga e whā ngā whārangi, mehemea e 400 ngā tāngata kei te mahi, nā te nui o ngā mahi whakahaere, tērā pea kāore e tere te whakaoti! Kei te kaha tonu ngā Kaipūtaiao Rorohiko ki te rapu i ngā huarahi pai ki te wāwāhi i ngā hopanga, kia taea ai te whakamahi i ngā rorohiko e mahi whakarara ana, kia kimi e hia, ko ēhea hoki ngā wāhanga o te mahi ka taea te mahi i te wā kotahi, ā, ko ēhea ngā mahi me whai haere ngā mahi tētahi wāhanga ki tētahi wāhanga.

Kei ēnei akomanga he ngohe mahitahi whakangahau e whakaatu ana i tētahi tukanga kōmaka whakarara. Ka taea te mahi hei ngohe pepa, engari ka hiahia mātou kia mahi ngā ākonga, kia nui te āwhata, kia oma haere mai i tētahi kōpuku o te whatunga ki tētahi atu.

Hei tāpiri atu ki ēnei kōrero, ahakoa te take i kīia tēnei he "whatunga" ko tēnei tētahi o ngā momo whatunga maha e kitea ai i te Pūtaiao Rorohiko. Ko tētahi o ngā momo 'whatunga" ka kitea whānuitia ko te whatunga whakawhitiwhiti, pērā ki ngā whatunga whakawhitinga ā-waea mō ngā waea pūkoro me te Ipurangi anō hoki! He whatunga anō ka whakaahuahanga i ngā mea pērā ki ngā mahere huarahi me ngā ara waka rererangi. Kia mōhio mārika, ehara te Whatunga Kōmaka o tēnei ngohe i te momo ōrite ki ērā momo whatunga, ka kīia he whatunga whakatairite, nā te mea ko te mahi o ia kōpuku o te whatunga, he whakatairite i ngā uara e rua, ka kore e tūhonohono i ngā pūrere (pērā ki te rorohiko, te waea rānei).

Ngā Hangarau Matihiko | Ngā Hātepe

Ki te whakamahi i te Whatunga Kōmaka, me whai ngā ākonga i te hātepe māmā, me mōhio mārika rātou, ki te kore e hāngai rawa te mahi ki te hātepe, pērā ki tā te rorohiko e whai ai, kāore e kore ka hapa, ka kore e puta te otinga tika, ka kore rānei he otinga noa! Ka mahi tahi ngā ākonga kia haere ngātahi ai ngā wāhanga o te hātepe, nā te mea, ki te whiti tētahi o rātou ki mua rawa, ka kore ia e tū ki te kōpuku e tika ana, ka hapa te tukanga mō te katoa. He tino maha ngā hātepe mō ngā Whatunga Kōmaka whāomo me ngā momo rahi rerekē, ka tūhura ngā kaipūtaiao rorohiko i ērā kia whakamātau te waihanga i ngā whatunga pai rawa anō. Heoi anō, he mahi whīwhiwhi rawa tērā, nā, mō ngā ākonga e hanga ana i ō rātou whatunga, ka whakamahi i ngā whatunga māmā noa iho.

He whakamarama i ngā kupu

• Pūtukatuka/CPU: He momo pūrere hei whakahaere i ngā papatono rorohiko.
• Tukatuka whakarara: Te whakamahi i ngā pūtukatuka maha ki te whakamahi i ngā wāhanga rerekē o te hopanga i te wā kotahi.
• Tukatuka Tāuhu: Ko te whakahaere i tētahi papatono ki tētahi pūtukatuka kotahi, kia whai haere ai te whakamahi o ngā tono, tētahi i tētahi.
• Whatunga: He kōmaka kua honohonoa, pērā ki te whatunga rorohiko, te mahere huarahi, te whatunga whakatairite rānei.
• Hipanga Tātai: He pāheko kotahi, ka whakamahi i tētahi wāhanga o tētahi hātepe.
• GPU/Wae Tukatuka Whakairoiro: He momo pūtukatuka mō ngā rorohiko, ka mahi whakarara i ngā pāheko māmā mō ngā tongiiti maha o tētahi whakaahua. Ka whakamahia hoki mō momo tātai kē atu, nā te mea ka taea te tukatuka whakarara.

Ngā pānga ki te ao tūturu

Tērā pea, ka tere ake, iti iho te utu hoki ki te tuku i ngā pūtukatuka pōturi maha ki te whakaoti i te hopanga tātai i te tuku i te pūtukatuka tere kotahi. Ko ngā kamupene e whakahaere ana i ngā tūmau kapua nūnui, e kimi ana i te ohaoha pai, ka whakamahi i te maha o ngā pūrere pōturi, ngāwari te utu, kaua ko te torutoru o ngā mea tino tere, nui te utu. Heoi anō, ko te herenga nui mō tēnei, me kimi huarahi ki te wāwāhi i ngā tukanga tātai ki ngā pūtukatuka maha. He ngāwari tēnā mō ētahi hopanga tātai, engari kore rawa e taea mō ētahi atu. Kei waenganui tēnei o ngā mahi i aua pito e rua.

Ki te wāwāhi i te pāheko itiiti pēnei (te whakatairite i ngā uara e rua) ki ngā pūtukatuka maha, me whakamahi i tēnei hātepe ki te pūmāro motuhake. I ēnei rā, ka whakamahia mō ngā kaupapa motuhake noa, engari ka whakamahia tēnei tukanga ki ngā GPU (pūtukatuka whakairoiro) o te rorohiko, nā te mea he pūtukatuka kaha ērā ki te tātai whakarara i te maha o ngā mahi māmā.

I waihangatia ngā whatunga kōmaka i mua rā anō i te taenga mai o ngā GPU kaha nei; he āhuatanga whakaihiihi tēnei o te pūtaiao rorohiko - ko ētahi o ngā tūhuratanga ka puta i mua i te putanga o ngā pūrere e taea ai te whakatinana i aua mea kua tūhuratia, kua rite tātou mō te pūrere hou i te wā ka taea te whakamahi! Heoi anō, ko te hātepe i tūhuratia i ēnei akomanga ehara i te momo hātepe e whakamahia whānuitia ana, nā te mea, mō ngā kōmaka i te nuinga o ngā rorohiko, kotahi anake te whakatairite e taea ai i te wā kotahi; ka tirohia ērā atu momo hātepe kōmaka e whakamahia whānuitia ana kei tētahi atu akomanga. Ko te tino whāinga o ēnei akomanga kia tīmata ngā ākonga ki te tūhura i ngā āhuatanga kaha me ngā ngoikoretanga o te wāwāhi i ngā mahi ki te maha o ngā pūtukatuka, ehara ko te pūtukatuka kotahi noa iho.

Ko tētahi o ngā ara mō te tātai whakarara, ka kīia ko te "MapReduce", ka whakamahia whānuitia i ngā pūnaha rorohiko kapua, ka wāwāhia te mahi rorohiko tino nui ki te rōpū nūnui o ngā pūtukatuka.

He pātai whakaata

• He aha te akoranga ohorere rawa i puta i ngā akoranga o tēnei kōwae ako?
• Ko wai mā ngā ākonga kaha ki te whai i ngā tukanga kia tika i a rātou e mahi ana i ngā ngohe?
• Ko wai mā ngā ākonga kaha ki te aro ki ngā taipitopito o ngā mahi o ā rātou ngohe?
• He aha ngā mea ka panoni pea ahau mō taku whakaako i tēnei kōwae ako?